Su i muri veci,
incariolai dal tempo,
da la parte umida,

dove no bate el sol,
co le raìse che par onge
che sgrafa el maton,

ogni stagion, sul stesso posto,
nasse le Boche da Leon.


Bianche, rosa e zale,
su i muri de i rii e de le cale,
ghe dà a Venessia un toco de color:

un dono de la natura a sta popolassion.

Anca nialtri semo tacai co le onge

ai muri veci, dove no bate el sol:
custodi de sto Museo
che vive de stagion.


L'inverno, longo e fredo,
insieme ne fa sparir.

Ma al primo sol de marso
tornemo a rifiorir.


E anca par sto ano
vivemo sta stagion,
nialtri venessiani...

e le Boche de Leon.